സ്മാര്‍ട്ട് മീറ്ററുകളിലേക്ക് മാറാന്‍ പരമ്പരാഗത രീതികള്‍ വിശ്വസിക്കുന്ന പല കുടുംബങ്ങളും തയ്യാറായിട്ടില്ല. പ്രത്യേകിച്ച് സ്മാര്‍ട്ട് മീറ്ററുകള്‍ പറക്കുമെന്ന ആശങ്ക കൂടി ജനങ്ങളെ ഇതില്‍ നിന്നും അകറ്റുന്നു. പക്ഷെ എനര്‍ജി കമ്പനികള്‍ക്ക് ഇത് കൈയും കെട്ടി നോക്കിനില്‍ക്കാന്‍ കഴിയില്ലല്ലോ! അതുകൊണ്ട് തന്നെ 50,000 പൗണ്ട് പ്രതിവര്‍ഷം ബോണസ് ലഭ്യമാക്കി കൊണ്ട് വീട്ടുപടിക്കല്‍ എത്തി സ്മാര്‍ട്ട് മീറ്റര്‍ അടിച്ചേല്‍പ്പിക്കാന്‍ വാക്ചാരുതയുള്ള എനര്‍ജി സെയില്‍സ്മാന്‍മാരെ തേടുകയാണ് കമ്പനികള്‍.
വീട്ടുടമകളെ കാര്യങ്ങള്‍ ബോധ്യപ്പെടുത്തി സ്മാര്‍ട്ട് മീറ്ററുകള്‍ തലയില്‍ കെട്ടിവെയ്ക്കുകയാണ് ഈ ജോലിക്കാരുടെ പരിപാടി. പ്രധാന എനര്‍ജി കമ്പനികളുടെ ജീവനക്കാര്‍ വാതില്‍ക്കല്‍ എത്തുന്നതും, ഫോണില്‍ വിളിക്കുന്നതും ഇനി തുടര്‍പരിപാടിയാകും. ഇതുസംബന്ധിച്ച തൊഴില്‍ പരസ്യങ്ങള്‍ ഓണ്‍ലൈനില്‍ സ്ഥാനം പിടിച്ചിട്ടുണ്ട്. ഓരോ അര മണിക്കൂറിലും റീഡിംഗ് ഓട്ടോമാറ്റിക്കായി സേവനദാതാക്കളെ അറിയിക്കുന്ന സ്മാര്‍ട്ട് മീറ്ററുകള്‍ എത്ര പവര്‍ ഉപയോഗിക്കുന്നുവെന്ന് ഉപയോക്താക്കളെ പൗണ്ടും, പെന്‍സും വേര്‍തിരിച്ച് അറിയിക്കുകയും ചെയ്യും. 
സ്മാര്‍ട്ട് മീറ്ററുകള്‍ക്കൊപ്പം പ്രത്യേക എനര്‍ജി താരിഫും സെയില്‍സ് ജീവനക്കാര്‍ ജനങ്ങള്‍ക്ക് വില്‍ക്കാന്‍ ശ്രമിക്കും. ആഴ്ചയില്‍ 1000 പൗണ്ടില്‍ കൂടുതല്‍ കമ്മീഷന്‍ ലഭിക്കുന്ന ജോലിക്ക് ഇറങ്ങാന്‍ ആളുകള്‍ ഓടിയെത്തുമെന്നാണ് കരുതുന്നത്. ഇതിന് പുറമെ ടാര്‍ജറ്റ് പിടിച്ചാല്‍ ഫുട്‌ബോള്‍ മത്സരങ്ങള്‍ക്കും, മ്യൂസിക് ഇവന്റുകള്‍ക്കും സൗജന്യ ടിക്കറ്റും ലഭിക്കും. ചാരിറ്റി ഫണ്ട് റെയിസര്‍മാരായി പ്രവൃത്തി പരിചയമുള്ളവര്‍ക്കാണ് ചില കമ്പനികള്‍ മുന്‍ഗണന നല്‍കുന്നത്. ആളുകളെ തടഞ്ഞുനിര്‍ത്തി മാസവരി അടിച്ചേല്‍പ്പിച്ച ആളുകളാണ് ഇവര്‍.
സ്മാര്‍ട്ട് മീറ്ററുകള്‍ അടിച്ചേല്‍പ്പിക്കുന്നതായി പരാതി ഉയരുന്നതിനിടെയാണ് പടിവാതില്‍ക്കല്‍ സെയില്‍മാന്‍മാര്‍ നിറഞ്ഞ പുഞ്ചിരിയുമായി വീഴ്ത്താന്‍ എത്തുന്നത്.
